مروه و مصطفي حيحكولنا تايلاند ممكن تعمل فيها إيه كعيله و خصوصا أن مصطفي راحها و هو أعزب فبيدينا الخلاصه و الفرق ما بين الحالتين و المزارات المناسبه لكل حاله . تفاصيل الرحله من أماكن و أكلات و مواصلات و مشاهدات يوميه و شوية نصايح للي بيخطط الرحله دي أو اللي نفسه يسافر معاهم في الحكايات

نعي في البودكاست ده حتحكلنا عن كتابتها في أدب الرحلات و التاريخ و الحكايات اللي ورا كل كتاب و تاريخ أماكن أعتدناها و معمار فني و حكياته في مدن مختلفه في أوروبا و أمريكا و دول عربيه ، أسمع البودكاست ده حتطلع رحله ممتعه عن العشق و السفر

بودكاست النهارده مش عن رحله و لا فسحه ، النهارده معانا دكتور سويلم طبيب نفسي في مهام نقل لمرضى من بلد لبلد تبع هيئات دوليه .أسرار و قصص منعرفش عنها من التجهيزات الطبية في الطياره و لناس بتسافر معانا بظروف لا نتخيلها ، مواقف شيقه و غريبه و نصايح لينا من دكتور مسافر ، لو ليك شوق في شوية أثاره 🎧 أسمع البودكاست ده و أستمتع حتي أخر لحظه

المغرب وجهه سياحيه طالعه بسرعة الصاروخ عالميا ، يا تري العالم كله متجه ليها لية؟ محمود فخري أقوي مرشد و صاحب أكبر رحلات للمغرب حيحكلنا عن المغرب ، تقعد قد إيه و تروح فين و تدفع كام و كل سؤال جاه علي بالك علشان تسافر هناك حتسمع أجابته من محمود . أسمع 🎧 البودكاست و سافر في رحله متنظمه بحرفيه علي كنبتك 😉

إيمان حتحكلنا في البودكاست ده إزاي قدرت تلاقي أكتر من فرصه تسافر و تتعلم تأمل مجانا في المغرب و تايلاند . شغفها في السفر داخلها في مناطق جديده أتعلمت فيها و أتعرفت علي نفسها بشكل أحسن . قدمت إزاي و عملوا إيه هناك و لو عايز توصل زيها تعمل إيه .. أسمع 🎧البودكاست ده علشان تعرف كل الحدوته

سعيد الخولي لف كل صحاري مصر شبر شبر ، حيحكيلنا اللي مانعرفهوش ، الديناصورات اللي لقوها ، الكهوف ، الحيوانات المرعبه الموجوده في صحرا. و حواديت عن الطيور المهاجره و الصيد الشريف و الطبخ في الصحرا. أسمع البودكاست ده و حضر نفسك لقاعدة طويله بدون بربشه و فيه مفاجأة من ترافل كودز في أول البودكاست بلغونا رأيكم فيها علي الصفحه 😉

حكاية عيلة لفيت في إيطاليا ، حتعرف عن البلد و جمالها في الطبيعه و المعمار و كل مدينه زرناها ، مواقف طريفه و صعبه ومغامرات . أكتر حاجه حتسمع عنها في البودكاست هي الأكل الإيطالي علشان تعمل حسابك مروه و مصطفي حيجوعوك 😉

محمود مؤسس have a dream , الأكبر و الأقدم و يمكن الوحيده اللي بتقدم فرص سفر تطوعي منظم في مصر هو ضيفنا. حيحكلنا أزاي تقدر تسافر عن طريق التطوع، هو بدأ أزي و بيعملوا إيه في التطوع و بيروحو فين. قصص كتير حتفتحلك باب عالم جديد ، أسمع البودكاست و أعرف السكة لمتعة جديدة في الحياة السفر و التطوع و المساعده و ممارسة الإنسانية

شيرين حتفرجنا علي الهند في مغامرتها علي موتوسكل لوحدها مع مفارقات غريبه و ناس مختلفه ، وقوع و توهان و بيات في مزرعه و قري صغيره و حواديت كواتش سيرفنج من هنا لبكره و أكل مختلف. تعالوا نسمع و نتفرج معاها

جزر المالديف مبنعرفش عنها غير صورة الفيلا اللي وسط بحر حلو قوي و صينية الفطار في البيسن ، و في نفس الوقت بنلاقي أعلانات رحلات أسعرها معقولة مش لايقة علي الدلع ده ، و تفاصيل كتير في النص مش واضحة . في البودكاست ده مصطفي و مروة حبحكولنا حواديت مفصلة عن المالديف ، إية الجزر دي و أنقي مكان فيها أزاي و الفرق بين الجزر إية . بعد البودكاست ده حتعرف تخطط سفريتك للمالديف و تفهم تفاصيل أي أعلان حتشوفه و تتقي المناسب ليك

عايز تسمع بيبيعوا إيه في السوبرماركت في البلاد المختلفة غير اللي في بلدك و رأي دينا البنت المصرية الحريفة في السوبرماركت و مشهورة أنها الوحيدة اللي بتعمل تقييمات عن المنتجات علي السوشيال ميديا لما جربت منه حاجات كتيرة و غريبة و لذيذة، اسمع البودكاست ده حتتعرف على السوبرماركت و تجيب منه إيه في اليابان و أمريكا و هولاندا و الهند و اخرون

في البودكاست ده حتعرف إزاي تقدر تاخد أكتر من منحة، أمل حتحكي لنا عن منح و سفريات بدأت معاها من المراهقة و لحد ما خلصت الجامعة و إشتغلت. المنح كانت جوة مصر و في أمريكا و جنوب أفريقيا، كل المنح دي لسة موجودة و لما تعرف قصة أمل الملهمة حتعرف السكة و توصلهم إزاي. لو مهتم بمعلومات عن التعليم برة بدون مصروفات، البودكاست ده ليك، لو حابب تسمع قصة نجاح تحمسك تكمل أي مشوار، إسمع البودكاست ده

سفرية لكينيا بطفل ممكن تقلب بنكد إلا لو عملتها كينيا لايت فيرچين بأنشطة بسيطة تنفع لأسرة. في البودكاست ده مروة و مصطفى حيحكولنا زاروا إيه مع طفلهم في كينيا ومازاروش إيه، والحياة البرية مع الحيوانات هناك، غير المواقف الغريبة و المغامرات اللي قابلتهم هناك من أول ما ركبوا الطيارة من الفيز المستعصية و الشهادة الصفرا. إسمع البودكاست ده و سافر معاهم في رحلة إلي كينيا الفيرچين اللايت

في البودكاست ده علي حيحكلنا بالتفصيل إزاي طلع عمرة لوحده من غير شركة سياحة و وفر نص التكلفة من غير ما يكون معاه فيزا تانية تساعده و لا إقامة أجنبية. حتحتاج تركز في كل تفصيلة علشان تعمل زيه بالظبط

يعني إيه تعليم حر و أحسن من تعليم المدرسة، سارة مدربة تعليم حر و مصممة تجارب تعلم حر عن طريق السفر حتحكيلنا التفاصيل و عملت كده أزاي مع أبنها في رحلة أستمرت سنة و ربع. ده طلع فيه مجتمعات للتعليم الحر و مش ناس كتير تعرف عنها، هي حتعرفنا عليها، لو حابب تجربة مختلفة تعلم بيها ولادك أسمع البودكاست ده فيه كل المعلومات الأساسية و نتيجة عملية لناس طبقت الكلام ده.

في البودكاست ده حتعرف كل حاجة عن الدراسة في تركيا، التقديم، التكلفة، طريقة العيشة هناك كطالب. علشان لو بتفكر تقارن بين الدراسة في تركيا ولا في روسيا، إسمع البودكاست ده وإسمع البودكاست اللي فات عن الدراسة في روسيا 😉 حتعرف بالظبط مين الأفضل لك

عمر بيدرس الجامعة في روسيا بقاله تلات سنين ، حكلنا بقى رحلته من مجموع الثانوية العامة اللي أضطره يسافر و إزاي و الورق المطلوب، لحد رحلة التكيف و الإستمتاع في العيشة في روسيا و عمل صداقات و مجتمع هناك. محتاج إيه و حيكلفك كام الدراسة و الإقامة و مين يقدر يساعدك في ده … تأثير الحرب علي الحياة حاليا في روسيا كل ده حتعرفه لما تسمع البودكاست ده و تتعرف علي روسيا أكتر

البودكاست ده عزيز على قلبي علشان بنحكي لكم فيه سفرية عيد ميلادي المفاجأة اللي مصطفى خططلها بعناية في السر 🤫. واحدة من أحلي زيارتنا للبنان. حتى لو رحت لبنان قبل كده في البودكاست ده حتعرفها بشكل تاني و حنعرفك على أماكن جديدة بكل تفاصيلها لو غاوي السفريات المختلفة و الإستمتاع المميز إسمع البودكاست ده

البودكاست ده مختلف جدا لأني بتكلم فيه مع مصطفى من بودكاست أفر جرين اللي دايما بيتكلم عن البساطة و المحافظة على البيئة، بس النهاردة الكلام كله عن السفر و إزاي كل واحد فينا بيحاول يشيل أقل شنط سفر و حنطلعلكم كل أسرارنا 😉

في الميني بودكاست ده حنقول كل التركات و الأفكار اللي حتحمينا من الكوارث و الفضايح في السفر مع الأطفال، من أول تحضير الشنطة و رحلة الطيارة لخطة الخروجات و الفسح. إسمع البودكاست ده و شاركه مع الأهالي الحيرانة